Bakı Dövlət Universiteti Biologiya fakültəsi

21 may 2024-cü il tarixində Bakı Dövlət Universitetinin (BDU) Tələbə Elmi Cəmiyyətinin (TEC) təşkilatçılığı ilə "Yaşıl dünya naminə həmrəylik ili" çərçivəsində üç gün davam edən elmi seminarlar silsiləsinin ikinci günü baş tutub. Bu gün çərçivəsində biologiya fakültəsinin TEC üzvləri Əlizadə Nurgül və Qasımova Zümrüdün təqdimatında "Gaianın göz yaşları" adlı elmi seminar keçirilib.

Seminarda ekosistemlərdə yaranan problemlər və onların həll yolları müzakirə edilib. Məruzəçilər CO2 konsentrasiyasındakı artımın qlobal istiləşməyə, iqlim dəyişikliklərinə, turşulu yağışlara, quraqlığa və şoranlığa təsiri barədə geniş məlumat veriblər. Həmçinin, bu çərçivədə dünyada və ölkəmizdə keçirilən COP29 və EcoServe kimi proqramların əhəmiyyəti vurğulanıb.

Bundan əlavə, Ermənistanın Qarabağda həyata keçirdiyi ekoloji istismar nəticəsində təbiətə vurduğu zərər və Azərbaycanın işğaldan azad olunmuş ərazilərində aparılan sıfır karbon siyasəti barədə məlumat verilib.

Seminar iştirakçıların sual-cavab sessiyası ilə yekunlaşıb.