"Xatirələrdə Yaşayan Lider" tədbiri keçirildi
12 dekabr 2024-cü il tarixində Bakı Dövlət Universitetinin (BDU) "BDU Könüllüləri" təşkilatının Biologiya və Tarix fakültələrinin birgə əməkdaşlığı ilə Ümummilli lider Heydər Əliyevin anım gününə həsr olunmuş "Xatirələrdə Yaşayan Lider" adlı tədbir keçirilib.
Tədbir Tarix fakültəsinin könüllülər sədri Vüsal Qaflanovun açılış nitqi ilə başlayıb. Daha sonra çıxış üçün söz Tarix fakültəsinin Arxeologiya və Etnoqrafiya kafedrasının müdiri, tarix üzrə elmlər doktoru və dosent Tarix Dostıyevə verilib. O, öz nitqində Ümummilli lider Heydər Əliyevin Azərbaycan Respublikası üçün gördüyü tarixi əhəmiyyətli işlərdən bəhs edib. Nitq zamanı Heydər Əliyevin hakimiyyət dövrlərində arxeologiya və etnoqrafiya sahəsində aparılan islahatlar, maddi-texniki bazanın möhkəmləndirilməsi, arxeoloji ekspedisiyaların təşkili, Azərbaycan arxeologiyasının Qafqaz regionunda mövqelərinin gücləndirilməsi kimi mühüm məsələlərə toxunulub.
Tədbirin davamında Vüsal Qaflanov Ümummilli liderin birinci və ikinci hakimiyyət dövrlərində Azərbaycanın inkişafı üçün atdığı mühüm addımları və tarixi nailiyyətləri auditoriyaya çatdırıb.
Sonda Biologiya fakültəsinin könüllülər sədri Nadir Nadirli çıxış edərək Ümummilli lider Heydər Əliyevin gənclər siyasətindən danışıb. O, Heydər Əliyevin gənclərin inkişafına yönəlik addımlarının bu gün də dövlət siyasətinin mərkəzində olduğunu vurğulayıb.
Tədbir Ümummilli liderin xatirəsinə dərin ehtiram və gənclər arasında onun irsinin təbliği baxımından böyük əhəmiyyət daşıyırdı.
