ŞƏHİD AİLƏLƏRİ ZİYARƏT EDİLDİ
8 may 2022-ci il tarixində Bakı Dövlət Universitetinin Biologiya fakültəsinin bir qrup tələbə və əməkdaşları tərəfindən şanlı qələbəmizə töhfə vermiş Biologiya fakültəsinin məzunları - şəhid olan Nadir Nadirli və Tərxan Qurbanovun ailələri ziyarət edildi. Biologiya fakültəsinin dekan müavini, tələbə və müəllimləri tərəfindən ilk öncə Tərxan Qurbanovun uyuduğu Mingəçevir Şəhidlər xiyabanında qəbri ziyarət edilmiş, əklil qoyularaq ruhuna dualar oxunmuşdu. Fakültə əməkdaşlarından dekan müavini Natəvan Baxşəliyeva, müəllimlər Möhübbət Nəcəfli, Sevinc Məmmədova, Kəmalə Əsədova və Tələbə Həmkarlar İttifaqı komitəsinin sədri Rza Ələkbərov daha sonra doğma Şəmkir torpağında uyuyan Nadir Nadirlinin qəbrini əzizləri ilə birlikdə ziyarət etmiş, ruhu qarşısında baş əymişlər. BDU ailəsi adından əməkdaşlar torpaqlarımız uğrunda canlarından keçmiş hər iki şəhid oğlunun ailəsində olmuş, onların məişət problemləri ilə maraqlanmışlar.
Nadir Nadirli və Tərxan Qurbanovun əzizləri ilə görüşmək, onlara qayğı göstərmək, özəl günlərdə şəhid analarının yanında olmağı özlərinə borc bilən fakültənin hər bir müəllim və tələbəsinin məzun şəhidlərini heç bir zaman unutmayacağını BDU Biologiya fakültəsi ailəsi adından nəzərə çatdırmışlar.
Həyat davam edir. Nadir Nadirlinin körpə yadigarı Nadiya böyüyür. Biz arzu edirik ki, gözəl balamız igid atasının ruhunu həmişə sevindirsin, ona layiq Vətən övladı kimi böyüsün və Bakı Dövlət Universitetində təhsil alsın.
