Bakı Dövlət Universiteti Biologiya fakültəsi

07.10.2022-ci il tarixində  Biologiya fakültəsində görkəmli alim Qara Teyfur oğlu Mustafayevin anım gününə həsr edilmiş "Ornitoloji problemlərin ekoloji aspektləri" mövzusunda dəyirmi masa keçirilmişdir. Dəyirmi masada fakültə rəhbərliyi, Zoologiya və fiziologiya kafedrasının əməkdaşları, gənc tədqiqatçılar və magistrantlar iştirak etmişlər. İlk olaraq fakültə dekanı prof. Afət Məmmədova Vətən müharibəsində canlarından keçən şəhidlərimizin xatirəsini 1 dəqiqəlik  sükutla yad etməyi təklif etmişdir. Daha sonra Afət Məmmədova ölkənin ən populyar təbiətşünası, biologiya elmləri doktoru, professor Qara Teyfur oğlu Mustafayevin biologiya elminə verdiyi töhfələr haqda danışaraq onun xatirəsinə həsr edilən tədbirin təşkilinin gənclərə də örnək olduğunu vurğuladı. Zoologiya və Fiziologiya kafedrasının müdiri, dos. Əbülfəz Tağıyev onun iştirakı ilə çəkilən “Təbiəti sevənlər” verilişindən fraqmentlərə baxaraq alimin həyat və yaradıcılığı haqda məlumat verdi. Daha sonra Azərbaycanda ornitologiyanın müasir vəziyyəti, ətraf mühit dəyişkənliklərinin quşların növ müxtəlifliyinə təsiri və s. məsələlər ətrafında müzakirələr aparıldı. Alimin dəyirmi masada iştirak edən yetirmələri – Nərminə Sadıqova, Sevinc Hümbətova, Anar Məmmədov, o cümlədən onun məktəbinin davamçıları Canbaxış Nəcəfov, Aftandil Musayev, Çingiz Məmmədov, Sevinc Məmmədova gənc doktorant və magistrantlar qarşısında ornitologiyanın müasir problemləri və ekoloji aspektləri barədə  çıxışlar etdilər.     

Növbəti gün, 8 oktyabr tarixində isə Zoologiya və fiziologiya kafedrasının müdiri Əbülfəz Tağıyev və bir qrup əməkdaşlar professor Qara Mustafayevin dəfn olunduğu Kürdəmir rayonu, Dəyirmanlı kəndində alimin məzarını ziyarət edərək öz xatirələrini bölüşmüş, mərhumu xoş sözlərlə yada salıb, ruhuna dualar etmişlər. Tədbir görkəmli alimin doğulub boya başa çatdığı ata ocağında verilən ehsan süfrəsində iştirakla yekunlaşmışdır.