Bakı Dövlət Universiteti Biologiya fakültəsi

Bakı Dövlət Universitetinin Biologiya fakültəsində Pakistanın Quaid-i-Azam Universiteti (İslamabad) Bitki Elmləri şöbəsinin professoru Muhammad Zafarın elmi təqdimat keçirilib.

Professor Zafar tədbir çərçivəsində fakültənin magistrant və doktorantları ilə görüşərək bitki tozcuqları, tozlanma prosesi və onların bioindikator kimi tədqiqi istiqamətində apardığı elmi tədqiqatlar barədə geniş təqdimatla çıxış edib. O, mikroskopik səviyyədə tozcuqlar üzərində aparılan silsilə tədqiqatlardan nümunələr təqdim edərək bu sahədəki praktiki və nəzəri təcrübəsini bölüşüb.

Alim həmçinin beynəlxalq elmi bazalarda yüksək reytinqli məqalələrin hazırlanması və nəşri ilə bağlı uğurlu təcrübəsini iştirakçılarla bölüşüb, elmi işlərin keyfiyyətinin artırılması istiqamətində faydalı tövsiyələr verib və iştirakçıların suallarını cavablandırıb.

Görüşdə tərəflər arasında birgə tədqiqat və əməkdaşlıq imkanları da müzakirə olunub. Professor Zafar hazırda bəzi magistrantlarla elmi işlər üzrə əməkdaşlıq etdiyini və gələcəkdə ortaq layihələrin həyata keçirilməsinin mümkünlüyünü vurğulayıb.