Özbəkistan və Qırğızıstan Respublikalarının alimləri BDU Biologiya fakültəsinin təşəbbüsü ilə Botanika və bitki fiziolgiyası kafedrasında və Botanika İnstitutunda olub
BDU Biologiya fakültəsinin həyata keçirdiyi “Biologiyada nailiyyətlər və çağırışlar” mövzusunda XII beynəlxalq elmi konfrans çərçivəsində Özbəkistan və Qırğızıstandan olan bir qrup alim heyəti əməkdaşlıq imkanlarının müzakirəsi məqsədi ilə Bakı Dövlət Universitetinin (BDU) Botanika və bitki fiziologiyası kafedrasında və Elm və Təhsil Nazirliyinin Botanika İnstitutunda olublar.
BDU Botanika və bitki fiziologiyası kafedrasının rəhbərliyi və əməkdaşları qonaqlara müxtəlif bitkilərin fiziologiyası və biomüxtəlifliyinə dair aparılan tədqiqatlar, Herbari fondu və nailiyyətlər haqqında danışıblar. Sonra Botanika İnstitutunun rəhbərliyi və əməkdaşlarının iştirakı ilə keçən görüşdə qonaqlara İnstitutun elmi-tədqiqat istiqamətləri haqqında məlumat verilib. Onlar Botanika muzeyi, Herbari fondu və laboratoriyalarla tanış olublar.
Alimlər Azərbaycanla qarşılıqlı kadr və təcrübə mübadiləsi, herbari materiallarının mübadiləsi, müştərək layihələrin təşkilinə dair geniş əməkdaşlıq imkanlarının olduğunu vurğulayıblar.
