“Güclü Qadınlar - Güclü Sabahlar” adlı tədbir keçirilib
“BDU Könüllüləri” təşkilatının Biologiya fakültəsi nəzdində fəaliyyət göstərən “Avisenna” klubu könüllülərinin təşəbbüsü ilə fakültədə “Güclü Qadınlar - Güclü Sabahlar” adlı tədbir keçirilib.
Tədbirdə “Avisenna” klubunun üzvləri tərəfindən Azərbaycan və onun hüdudları kənarında elmi tədqiqatları və mühüm nəticələri ilə öz sözünü demiş qadın alimlər - akademik Zərifə Əliyeva, akademik Validə Tutayuq, akademik İradə Hüseynova və Biologiya fakültəsinin inkişafında rolu olmuş güclü qadın alimlərimizin uğurlu elm yolları ilə bağlı məlumatlar təqdim edilmişdir. Tədbirin birinci hissəsinin sonunda “Adını Tarixə Yazmış Elm Qadınları” adlı videoçarx izlənilib.
Tədbirin ikinci hissəsində “Biologiya” elmi sahəsində uğur qazanmış gənc tədqiqatçılardan Elvira Təhməzli və Nərmin Ağalarova çıxış edib. Tədqiqatçılar elmi-tədqiqat sahəsində qazandıqları uğurların sirrini tələbələrlə bölüşüblər. Gənc tədqiqatçılar apardıqları elmi istiqamətlər və qadın olaraq əldə etdikləri elmi nailiyyətlər haqqında geniş fikirləri tədbir iştirakçılarının nəzərinə çatdırıblar.
Tədqiqatçılar çıxışların sonunda müəllim və tələbə heyətiylə birgə diskussiya apararaq müxtəlif sualları cavablandırıblar.
