Bakı Dövlət Universiteti Biologiya fakültəsi

Bakı Dövlət Universitetində (BDU) ali məktəb tələbələri arasında Ümummilli Lider Heydər Əliyevin anadan olmasının 101-ci ildönümünə və BDU-nun 105 illik yubileyinə həsr olunmuş fizika, riyaziyyat, kimya, biologiya və coğrafiya fənləri üzrə respublika olimpiadasının qaliblərinin mükafatlandırılması mərasimi keçirilmişdir.

Mərasimdə BDU-nun rektoru Elçin Babayev, Biologiya üzrə I Respublika Olimpiadasının təşkilat komitəsinin sədri Afət Məmmədova, Biologiya üzrə münsiflər heyətinin sədri adademik İradə Hüseynova, münsiflər heyətinin üzvü AMEA-nın müxbir üzvü Oqtay Qasımov və digər rəsmilər iştirak etmişlər.

Mərasimdə çıxış edən BDU-nun rektoru Elçin Babayev Azərbaycanda elm və təhsil sahəsində həyata keçirilən siyasətin uğurlu nəticələrindən danışmış, olimpiada hərəkatının ildən-ilə genişləndiyini qeyd etmişdir. Elçin Babayev olimpiadada iştirak etməyin tələbələr üçün xüsusi əhəmiyyət daşıdığını və onların sonrakı həyatına uğurlu təsir göstərəcəyini vurğulamışdır.

Biologiya Olimpiadasının Təşkilat Komitəsinin sədri Afət Məmmədova çıxışında olimpiadaların keçirilməsinin önəmindən danışıb. O, qeyd edib ki, olimpiadanin təşkilində məqsəd Biologiya elmləri üzrə ixtisaslı mütəxəssislərin hazırlanmasının keyfiyyətini daha da yüksəltmək, istedadlı tələbələri aşkarlamaq və dəstəkləmək, onları elmi-tədqiqat işinə cəlb etməkdir.

Biologiya üzrə olimpiadada Bakı Dövlət Universiteti, Azərbaycan Tibb Universiteti, Azərbaycan Dövlət Pedaqoji Universiteti, Sumqayıt Dövlət Universiteti, Gəncə Dövlət Universiteti, Azərbaycan Dövlət Aqrar Universiteti, Xəzər Universiteti, Odlar Yurdu Universiteti, Qərbi Kaspi Universiteti, Lənkəran Dövlət Universiteti və  Bakı Mühəndislik Universitetindən olmaqla 172 nəfər qeydiyyatdan keçərək ümumilikdə 160-dan çox tələbə iştirak edib.

Ümumilikdə, 11 nəfərin fərqləndiyi olimpiadada Azərbaycan Tibb Universitetinin tələbəsi Nurlan Məmmədov I yer, Bakı Dövlət Universitetinin tələbələri Şəbnəm Əlizadə və Yuliya Fominova II yer, Bakı Dövlət Universitetinin tələbələri Xədicə Əhədova, Zəhra Eynullayeva, Lənkəran Dövlət Universitetinin tələbəsi Ramin Mirzəcanov III yerə layiq görülmüşlər. Eyni zamanda BDU-nun tələbələri Rəvanə Niftullayeva, Elmira Məmmədova, Nəzrin Əliyeva, Azərbaycan Tibb Universitetinin tələbəsi Tahir Yaqubov, Gəncə Dövlət Universitetinin tələbəsi Arzu Vəliyeva, Qərbi Kaspi Universitetinin tələbəsi Minarə Kərimli yüksək nəticələrinə görə fərqləndirici diplomlara layiq görülmüşdür.

Bütün qalibləri təbrik edirik!