Biologiya fakültəsinin tələbəsi iştirak etdiyi YAP Yasamal komandası Ümumrespublika "Nə? Harada? Nə zaman?" intellektual yarışında uğur qazanıb
26 oktyabr tarixində Yeni Azərbaycan Partiyası tərəfindən “Yaşıl dünya naminə həmrəylik ili” çərçivəsində təşkil edilən Ümumrespublika "Nə? Harada? Nə Zaman?" intellektual yarışının final mərhələsində YAP Yasamal Rayon Təşkilatının komandası III yerə sahib çıxıb.
Bu komandada uğurla iştirak edən oyunçulardan biri Bakı Dövlət Universiteti Biologiya fakültəsinin Su bioehtiyatları və akvakultura ixtisası üzrə IV kurs tələbəsi İlahə Muradova Fariz qızı olmuşdur. O, komandası ilə birlikdə bilik və məntiqə əsaslanan bu gərgin yarışda yüksək nəticə göstərərək universitetinin adını layiqincə təmsil etmişdir.
Tədbirin sonunda qaliblər Azərbaycan Respublikasının Milli Məclisinin deputatı Sevinc Fətəliyeva tərəfindən mükafat və diplomla təltif olunmuşdur. BDU Biologiya fakültəsi tələbəsinin bu uğuru həm fakültənin, həm də universitetin intellektual arenada yüksək səviyyədə təmsil olunmasının bariz nümunəsidir.
Tələbəmizi təbrik edir, gələcək intellektual yarışlarda daha böyük nailiyyətlər arzulayırıq!
