Biologiya fakültəsinin əməkdaşları Bakı Iqlim Fəaliyyəti Həftəsində çıxış edib
Bakı Dövlət Universitetinin Bakı İqlim Fəaliyyəti Həftəsi çərçivəsində təşkil etdiyi konfransda Biologiya fakültəsinin Biologiya fakültəsinin rəhbərliyi, professor-müəllim heyəti, magistrantları iştirak ediblər.
Biotibbi materiallar kafedrasının müdiri, professor Ülviyə Həsənova, müəllimlər b.ü.f.d. Aygün İsrayılova və Nurlan Əmrahov “İstixana qazlarının (İQ) emissiyaları haqqında düşüncəmizdə inqilab: empirik məlumatların, süni intellektin və qabaqcıl analitikanın rolu”, “Elmi çağırışlarda qlobal və regional əməkdaşlığın rolu”, “İqlim dəyişikliyinin və paradiqma sürüşmələrinin transsərhəd su resurslarının idarə olunmasına təsiri” kimi mövzular ətrafında müzakirələrdə iştirak edib.
Empirik məlumatların işlənilməsi və qabaqcıl analitik vasitələrin tətbiqi iqlim dəyişikliklərinin daha dəqiq və tez proqnozlaşdırılmasına, habelə effektiv iqlim siyasətlərinin formalaşdırılmasına imkan yaradır. Konfransda süni intellektin iqlim modelləşdirməsindəki rolu, böyük məlumat dəstələrinin analitik işlənməsi və real vaxt rejimində optimal qərarların qəbul edilməsi məsələləri geniş müzakirə olunub.
İqlim dəyişikliyi xüsusilə su resurslarının idarə olunmasında ciddi təsir göstərir. Konfrans çərçivəsində transsərhəd su ehtiyatlarının idarə olunması, bu sahədə regional əməkdaşlığın gücləndirilməsi və su resurslarının ədalətli paylanması istiqamətində yeni yanaşmalar təqdim edilib.
İqlim dəyişikliyi ilə mübarizədə beynəlxalq əməkdaşlıq məsələsi müzakirələrin əsas mərkəzində olub. BMT-nin İqlim Dəyişmələri üzrə Çərçivə Konvensiyası çərçivəsində əldə olunan razılaşmaların icrası və ölkələrin milli iqlim planlarının (NDC) reallaşdırılması məsələləri konfrans iştirakçıları tərəfindən diqqətlə analiz edilib.
Bundan əlavə, innovativ texnologiyalar, karbon tutma və saxlama sistemləri, bərpa olunan enerji mənbələrinin tətbiqi, enerji effektivliyi və tullantıların azaldılması kimi məsələlər də əsas mövzulardan biri olub. Eyni zamanda, iqlim dəyişikliyinin sosial-iqtisadi təsirləri, iqtisadi artım, yoxsulluq, miqrasiya axınları və qida təhlükəsizliyi mövzularında da dəyərli fikir mübadiləsi aparılıb.
