Biologiya fakültəsinin əməkdaşı COP29 Mavi Zonada çıxış edib
20 noyabr 2024-cü il tarixində COP29 konfransı çərçivəsində Mavi Zonada ICESCO pavilyonunda Beynəlxalq Quru Ərazilər üzrə Kənd Təsərrüfatı Mərkəzinin (ICBA) təşkilatçılığı ilə panel müzakirəsi keçirilmişdir. Tədbirdə Biologiya fakültəsinin Molekulyar Biologiya və Biotexnologiyalar kafedrasının müəllimi Əmrahov Nurlan çıxış etmişdir.
Panel müzakirəsində Azərbaycan, Birləşmiş Ərəb Əmirlikləri (BƏƏ), Pakistan, Səudiyyə Ərəbistanı, Keniya, Malayziya və digər ölkələrdən olan nümayəndələr iştirak etmişdir. Müzakirənin əsas mövzusu "İqlim fəaliyyətində gənclərin və qadınların qida sistemlərinin transformasiyasında potensiallarının reallaşdırılması" olmuşdur. Panel çərçivəsində kənd təsərrüfatı sektorunun müxtəlif istiqamətlərində fəaliyyət göstərən gənc fermerlər, iqtisadçılar və alimlər müasir dövrdə qlobal ekoloji problemlərin həlli yolları barədə fikirlərini bölüşmüşlər.
Xüsusilə, qida məhsullarının azalması və bunun qarşısının alınması üçün dövlətlər səviyyəsində atılan addımlar ətrafında mövcud vəziyyət və dövlətlərarası əməkdaşlığın əhəmiyyəti vurğulanmışdır. Panel müzakirəsinin əsas istiqamətlərindən biri də qadınların və gənclərin kənd təsərrüfatı sektorunda maarifləndirilməsi, onların bu sahəyə daha çox maraq göstərməsi və bunun nəticəsində mövcud problemlərin həllinə töhfə verməsi olmuşdur.
