Bakı Dövlət Universiteti Biologiya fakültəsi

Birləşmiş Millətlər Təşkilatının Avropa İqtisadi Komissiyası (UNECE) və Ərzaq və Kənd Təsərrüfatı Təşkilatının (FAO) təşkilatçılığı ilə 8-12 iyul 2024-cü il tarixlərində Türkiyənin Antalya şəhərində keçirilmiş "Qafqaz, Mərkəzi Asiya ölkələri və Türkiyə üçün İnteqrasiya olunmuş Meşə Yanğınlarının İdarəetməsi və Aerokosmik Zondlama Tədqiqatı" təlimində Biologiya fakültəsinin dekan müavini Yusif Abiyev iştirak edib.

FAO və UNECE tərəfindən təşkil edilən bu təlim proqramında meşə yanğınlarının idarə olunması, aerokosmik zondlama metodları və biomüxtəlifliyin qorunması üçün müasir texnologiyalardan istifadə sahəsində əhəmiyyətli biliklər təqdim olunub. Tədbirdə Azərbaycan, Gürcüstan, Qazaxıstan, Qırğızıstan, Tacikistan, Türkmənistan, Türkiyə və Özbəkistandan olan mütəxəssislər bir araya gələrək meşə idarəçiliyi və yanğınların qarşısının alınması mövzusunda qabaqcıl təcrübələri müzakirə ediblər.

Təlim iştirakçıları FAO-nun 2025-ci il üçün Qlobal Meşə Resursları Qiymətləndirməsinə (FRA) töhfə vermək məqsədilə meşə ekosistemlərinin vəziyyəti və dəyişiklikləri haqqında məlumat toplayıblar. Təlim çərçivəsində fotointerpretasiya və aerokosmik zondlama texnologiyalarının tətbiqi üzrə interaktiv sessiyalar da təşkil olunub.

Antalya bölgəsində təşkil olunan təlimlər çərçivəsində iştirakçılar həmçinin yanğından sonra meşələrin bərpa edilməsi və idarə olunması mövzusunda sahə tədqiqatlarında iştirak ediblər. Təlim proqramının məzmununa uyğun olaraq, toplanmış biliklər və texnikalar Biologiya fakültəsinin tədris prosesinə inteqrasiya ediləcək, beləliklə, tələbələrin ekoloji idarəetmə və biomüxtəlifliyin qorunması sahəsində daha geniş biliklərə yiyələnməsi təmin olunacaq.