Bakı Dövlət Universiteti Biologiya fakültəsi

Biologiya fakültəsinin dekan müavini, Botanika və bitki fizologiyası kafedrasının müəllimi Əsədova Kəmalə Adil qızı 18-22 mart 2024-cü il tarixlərində Erasmus+ Teaching Mobility layihəsi çərçivəsində Rumıniyanın ən qədim universiteti olan Alexandru İoan Cuza İasi Universitetində səfərdə olmuşdur. Səfər müddətində K.Əsədova Alexandru İoan Cuza Universitetinin Erasmus üzrə koordinatoru, Molekulyar biologiya və genetika laboratoriyasının müdiri prof. Lucian Gorgan, Biologiya fakültəsinin dekan müavini prof. Çiprian Manzu, fakültənin professor-müəllim heyəti ilə görüşərək gələcək əməkdaşlığa dair fikir mübadiləsi aparmışdır. K.A. Əsədova fakültənin əməkdaşları, tələbə və magistrantları qarşısında "Azərbaycanın florası və bitkiliyi" mövzusunda mühazirə ilə çıxış etmiş, bir neçə seminar və laboratoriya dərsləri  keçirmişdir. Alexandru İoan Cuza Universitetinin Biologiya fakültəsinin geniş herbari fondu və laboratoriya otaqları ilə tanışlıq böyük maraq doğurmuşdur.  

Səfər zamanı K.A.Əsədova Alexandru İoan Cuza Universitetinin nəzdində fəaliyyət göstərən və təməli 1856-cı ildə qoyulan Botanika bağına da ziyarət etmişdir. Bağın əməkdaşı Cristiana Virginia yerli və introduksiya olunmuş bitki növləri barədə məlumat vermiş, Azərbaycan florası ilə müqayisələr edilmişdir.

Kəmalə Əsədova Alexandru İoan Cuza Universitetinin nəzdində yaradılan Azərbaycan Multikulturalizm Mərkəzində də olmuş, Mərkəzin sədri, Azərbaycan Multikulturalizmi fənnini tədris edən, Azərbaycan mədəniyyətini, tarixini, dilini sevən mütəxəssis, professor Lyudmila Bejenaru ilə görüşmüş, mərkəzin fəaliyyəti barədə müzakirələr aparılmışdır.