Bakı Dövlət Universiteti Biologiya fakültəsi

Bakı Dövlət Universiteti Biologiya fakültəsinin nəzdində yaradılmış “Bioteam” klubunun təşkilatçılığı ilə  Beynəlxalq Müəllimlər Gününə həsr olunmuş tədbir təşkil edilib. Tədbiri giriş sözü ilə fakültənin dekanı professor Afət Məmmədova açaraq, müəllimlik peşəsinin əhəmiyyətindən və cəmiyyətin inkişafındakı mühüm rolundan bəhs edib. O, müəllimlərin hər bir fənnin və insanın həyatında oynadığı əvəzolunmaz rolu vurğulayıb və müəllimləri təbrik edib.

Sonra tədbirdə fakültənin müəllimləri, dosent Anar Məmmədov və dosent Sevinc Hümbətova da çıxış ediblər. Onlar öz çıxışlarında təhsilin keyfiyyətinin yüksəldilməsi üçün müəllimlərin əzmkarlığının, tələbələrlə qarşılıqlı anlayış və əməkdaşlığının vacibliyini qeyd ediblər. Müəllimlərin çıxışları tələbələr və kollektiv tərəfindən alqışlarla qarşılanıb.

Bundan sonra Biologiya fakültəsinin fəalları tərəfindən qurulmuş "Bioteam" klubu və onun fəaliyyət istiqamətləri tələbələrə təqdim edilib. Klubun əsas məqsədi tələbələrin biologiya elminə marağını artırmaq, onların asudə vaxtlarını səmərəli keçirməsinə və sosial inkişafına dəstək verməkdir.

Tədbir fakültə tələbələrinin və BDU könüllülər təşkilatının LİNORPH klubunun təqdimatında çoxsaylı şer və musiqi nömrələri ilə davam edib və müəllimlər üçün xüsusi hazırlanmış video çarx təqdimatı ilə sona çatıb. Tədbir iştirakçıları müəllimləri bir daha peşə bayramı münasibətilə təbrik edərək, xoş xatirələrlə ayrılıblar.