“Avropada Təqaüdlə Təhsil” mövzusunda infosessiya keçirildi
Biologiya fakültəsinin 164R qrupunun təşkilatçılığı ilə fakültənin 4-cü kurs tələbələri üçün “Avropada Təqaüdlə Təhsil” mövzusunda infosessiya keçirilib. Tədbirin əsas məqsədi tələbələri Avropada təqaüdlə təhsil imkanları, təhsil prosesində qarşılaşa biləcəkləri tələblər və gələcək karyera perspektivləri barədə məlumatlandırmaq olub.
Infosessiyada Ametist Academy-nin təsisçisi və xaricdə təhsil mütəxəssisi Nurlan Rəsulov və xaricdə təhsil mütəxəssisi Göyçək Abduzadə çıxış edərək tələbələrə Avropada təqaüdlə və təqaüdsüz təhsil imkanları, qəbul prosesi, lazımi sertifikatlar və xaricdə təhsil aldıqları müddətdə qarşılaşa biləcəkləri çətinliklər haqqında ətraflı məlumat veriblər.
Tədbir çərçivəsində iştirakçılar xaricdə təhsil almaq üçün tələb olunan əsas meyarlar, universitet seçimində diqqət edilməli məqamlar, eləcə də təqaüd proqramlarının təqdim etdiyi üstünlüklər barədə suallarını ekspertlərə ünvanlayıblar. Eyni zamanda, xaricdə təhsil almış tələbələrin ölkəyə qayıtdıqdan sonra qarşılaşa biləcəkləri karyera imkanları və iş bazarında rəqabətlilik məsələləri də müzakirə olunub.
Tələbələr üçün maarifləndirici və motivasiyaedici xarakter daşıyan infosessiya böyük maraqla qarşılanıb və xaricdə təhsil almağı planlaşdıran tələbələr üçün vacib praktiki bilgilər təqdim edilib.
