Ali məktəb tələbələri arasında Biologiya üzrə I Respublika Olimpiadasının final turu keçirilib
Mayın 23-də Bakı Dövlət Universitetində (BDU) ali məktəb tələbələri arasında Ümummilli Lider Heydər Əliyevin anadan olmasının 101-ci ildönümünə və BDU-nun 105 illik yubileyinə həsr olunmuş Biologiya fənni üzrə I Respublika Olimpiadasının final turu keçirilib.
Olimpiadanın məqsədi Biologiya üzrə mütəxəssislərin hazırlanmasının keyfiyyətini daha da yüksəltmək, istedadlı tələbələri aşkarlamaq və dəstəkləmək, onları elmi-tədqiqat fəaliyyətinə cəlb etmək, habelə tələbələr arasında elmi bilikləri təbliğ etməkdir.
Elm və Təhsil Nazirliyinin dəstəyi, Bakı Dövlət Universitetinin təşkilatçılığı və Təhsil İnstitutunun metodiki köməyi ilə keçirilən Olimpiadada BDU tələbələri ilə yanaşı, Azərbaycan Dövlət Pedaqoji Universiteti, Sumqayıt Dövlət Universiteti, Universite, Gəncə Dövlət Universiteti, Azərbaycan Dövlət Aqrar Universiteti, Xəzər Universiteti, Odlar Yurdu Universiteti, Qərbi Kaspi Universiteti, Lənkəran Dövlət Universiteti və Bakı Mühəndislik Universitetindən ümumiulikdə 170 nəfər tələbə iştirak edib.
İştirakçılara verilən suallar peşəkar müəllimlər tərəfindən hazırlanıb və çətinlik səviyyəsinə görə olimpiadaların tələblərinə uyğun olub. Sualları cavablandırmaq üçün iştirakçılara 3 saat vaxt verilib. Proses başa çatdıqdan sonra cavablar müxtəlif ali təhsil müəssisələrinin nümayəndələrindən ibarət Münsiflər Heyətinə təqdim edilib.
Olimpiadanın qalibləri və mükafatçıları mayın 24-də elan olunacaq.
