“25 Oktyabr - Qubadlı Şəhəri Günü“
25.10.2023-cü il tarixində Bakı Dövlət Universiteti Biologiya fakültəsi Tələbə Gənclər Təşkilatının təşkilatçılığı ilə “25 Oktyabr - Qubadlı Şəhəri Günü“ adlı tədbir keçirilmişdir. Tədbir Azərbaycan Respublikasının himni ilə açıq elan edilmiş, şəhidlərin ruhu bir dəqiqəlik sükutla yad edilmişdir. Sonra tədbir iştirakçılarına Qubadlı şəhərinin bu şanlı günü haqqında məlumat verilmişdir. Tədbirdə qeyd edilib ki, müzəffər Azərbaycan Ordusu 2020-ci il oktyabrın 25-də Qubadlı şəhərini işğalçılardan azad edərək üçrəngli bayrağımızı 30 ilə yaxın müddətdən sonra həmin ərazilərdə qürurla dalğalandırıb. Həmin gün Azərbaycan Prezidenti, Müzəffər Ali Baş Komandan İlham Əliyev Zəngilan, Cəbrayıl, Qubadlı rayonlarının bir neçə kəndini və Qubadlı şəhərinin işğaldan azad edildiyini xəbər verib. Prezidentin Sərəncamına əsasən, Azərbaycan Respublikasının Qubadlı rayonunun işğaldan azad olunması uğrunda aparılmış döyüş əməliyyatlarında iştirak edərək igidlik və şücaət göstərmiş Azərbaycan Respublikası Silahlı Qüvvələrinin 9376 hərbi qulluqçusu “Qubadlının azad olunmasına görə” medalı ilə təltif edilib. Tədbirin sonunda bu şanlı günə həsr olunmuş videoçarx nümayiş etdirilmişdir.
